samoletЎзбекистон Республикаси ҳукумати бугун эрталаб Ақтўбе вилояти Ирғиз туманида автобуснинг ёниши натижасида ҳалок бўлган 52 нафар ўзбекистонликнинг жасадини ватанга келтириш учун самолёт ҳозирламоқда. Kun.uz нашрининг Соғлиқни сақлаш вазирлигидаги манбаси маълумот беришича, айни пайтда рейс Тошкентдан учишга тайёргарлик кўрмоқда.

«Айни шу дақиқаларда Тошкентдан рейс амалга оширишга тайёргарлик кўрилмоқда. Фавқулодда вазиятлар вазирлиги автобусда бўлган фуқароларнинг шахсини аниқлаш устида иш олиб бормоқда. Соғлиқни сақлаш вазирлиги тайёр турибди, жамоа шакллантирилган. Умумий гуруҳ тайёр бўлганида самолёт учади», — деди манба.

Қозоғистоннинг Ақтўбе вилоятида, «Самара-Чимкент» йўлида 52 нафар ўзбекистонлик ёниб кетган автобус Жанубий Қозоғистон вилоятидан Россия томон ҳаракатланаётганди. Автобусда жами 57 киши бўлган, уларнинг 5 нафари омон қолган, шундан 3 киши қозоғистонлик, 2 киши ўзбекистонлик.

Қозоғистонда Ақтўбе вилоятида содир бўлган воқеанинг сабабларини ўрганиш ва жабрланганлар ҳамда уларнинг оилаларига ҳартомонлама кўмак кўрсатиш учун махсус ҳукумат идоралараро комиссияси тузилган.