Главные новости
Главная / Жамият / Парвозлар тикланмоқда, лекин жавобсиз қолаётган саволлар бисёр
<

Парвозлар тикланмоқда, лекин жавобсиз қолаётган саволлар бисёр

Пандемия сабабли парвозлар тўхтатилиши натижасида пасайиш юз берган жаҳон авиаташувлар соҳаси аста секинлик билан тиклана бошлади. Агар чекловларга қадар бутун дунё бўйича суткасига 181 мингтагача рейс амалга оширилган бўлса, 17 июнь ҳолатига рейслар сони суткасига 118 мингтагача етди. Бу жаҳондаги авиаташувлар 65 фоизга тикланганини англатади.

Республика махсус комиссиясининг қарорига кўра, Ўзбекистон ҳам 15 июндан халқаро авиақатновларни қисман тиклай бошлади, хориждан келувчи рейслар ҳам «яшил», «сариқ» ва «қизил» рейсларга ажратилди. Йўловчиларга ҳам, авиаташувчиларга ҳам қатор талаблар қўйилди.

Бир қарашда ҳаммаси рисоладагидай, тартибларга амал қилинади ва учиб кетилаверади. Аммо қатор саволлар борки, уларнинг жавоби ё ўта мавҳум берилмоқда, ёки очиқ қолдирилмоқда.

Мисол учун:

  • Рухсат берилганлар рўйхатида даволаниш учун келаётган (чиқаётган) ва хорижда яқин қариндошлари ёхуд оғир касал бўлган қариндош-уруғлари мавжуд бўлган шахслар ҳам бор. Улар бунинг учун қандай ҳужжатларни қайси ташкилотга тақдим этишлари ва қай тартибда рухсат олишлари лозим?
  • Дастлабки босқичда умумий рейсларнинг неча фоизини тиклаш режалаштирилган? Қачон хорижий мунтазам рейсларга барча кассаларда чипталар сотуви бошланади?
  • Рухсат берилганлар тоифасига яна “Ўзбекистонда доимий рўйхатдан ўтган хорижий давлат фуқаролари, доимий яшовчи фуқаролиги бўлмаган шахслар, шунингдек, хорижий давлатда доимий рўйхатдан ўтган Ўзбекистон фуқаролари” дейилган. Бу хорижий давлатларда вақтинча рўйхатдан ўтган ёки нолегал мақомига тушиб қолганларга рухсат берилмаслигини англатадими?
  • Самолётлар бу қадар чекловлар билан учирилиши парвозларни оқлайдими, яъни «Uzbekistan Airways» чипталари сотилмай қолиш хавфи туғилмайдими?
  • Карантин давридаги халқаро парвозлар учун йўловчилар жойлашуви бўйича низом ишлаб чиқилганми? Аввал хабар берилган “3 қаторлик чеклов”, яъни учталик ўринларда фақат бир киши ўтирадиган чекловга амал қилинадими?
  • Ички рейсларда карантин қоидаларига қатъий амал қилиниши белгиланганди. Аммо нега бу режа амалга ошмади (Урганч – Тошкент йўналишидаги ҳолат мисол бўла олади)?
  • Энг муҳими, дунёнинг кўплаб давлатлари карантин шароитига мослашди, таваккал қилиб авиақатновларни тикламоқда. Қачон Ўзбекистон фуқаролари ва юртимизга келувчилар эркин тарзда авиачипта харид қилиб, бемалол парвоз қила бошлайдилар? Ахир коронавируснинг буткул йўқолиб кетишини кутишда мантиқ йўқлиги аён бўлмоқдаку.

Шу ва бошқа саволлар билан Ўзбекистон Республикаси транспорт вазирлигига бир неча марта мурожаат қилдик. Аммо бирорта жавоб ола билмадик. Вазирлик матбуот хизмати мавзу юзасидан махсус брифинг уюштиришга ваъда берди, ҳатто бу тадбир муддати белгиланди ҳам. Лекин ўзларига маълум сабаб билан брифинг ўтказилмади. Тайёрлиги айтилган битта баёнотни ўқиб, ҳеч бўлмаса энг муҳим саволларга жавоб беришнинг имкони топилмади. Қолдирилган брифинг яқин кунларда ўтказилиши ҳақида билдиришди, аммо бу ҳам амалга ошмади.

Дилни энг хира қиладигани жойи, авиақатновлар тикланаётганидан хабар топган хориждаги юртдошларимиз ва оғир касаллик туфайли ёки муҳим ишлари билан чет элга чиқишни интиқиб кутаётганлар ҳар куни мурожаат қилишда давом этмоқдалар.

Катта эҳтимол билан транспорт вазирлиги бу масалага махсус комиссия қарорлари зарурлиги, уларсиз ҳаракат қилиш ваколати йўқлиги билан жавоб беради. Аммо ҳаммамизга маълумки, махсус комиссия зарурат туфайли, тезкорлик билан тузилган. Унинг қарорлари қонунлардан устун эмас ва вақтинча характерга эга. Қолаверса, бу комиссияга вазирлик томонидан вазиятдан чиқиш борасида аниқ таклифлар берилса, рад қилинмаса керак. Ҳеч бўлмаганда, туғилган саволларга ойдинлик киритиб, келажакдаги режалар билан ўртоқлашишнинг иложи бор эди.

Начора, ҳар доимгидек кутамиз…

Ҳаққимизда anvarj63

Яна маълумот

uh1yb77csvkxnoocvl81euwqu6ggplob

Уйда даволанаётган беморлар учун махсус мобил гуруҳларнинг вазифалари белгиланди

2 июль куни «Коронавирус инфекцияси билан касалланган беморларни даволаш ва касаллик тарқалишини олдини олиш борасида …